Leeven Rolly, ov dat du un mir all ens die Strooß finge
die dohinführt, zo dem Continent, dem Land, der Stadt,
dem Dorf... ich jläuf dat es dat Minscheland vun dem du su off sprichs...

Alles Joode zom Jebootsdaach

Schmahl - Silvia - Christel - Brigitte

IRJENDWO DOVÖRE, WO DE STROSS OPHÖT........

Die wieße Stroß verschwemmp em Duns,
die Luff ziddert un danz.
Mi Jeseech es verbrannt, mi Hemb klätschnaaß,
ich ben op Jöck un föhle mich janz.
D'r Wind es heiß un schmus wie en Frau,
hä kütt tireck us d'r Sonn.
En Wolk, janz huh, verjeit em Blau.
Ich well an et Meer,
wo Olivebäum op Hüvvele ston.
 
Denn
irjendwo dovöre, wo de Stroß ophöt,
d'r Himmel erafkütt un met d'r Äd sich bütz,
do jitt et e Land, wo mer kein Kreje föht
un keiner mih als d'r andere besetz.
D'r Fridde wonnt do allt zick Iwichkeit,
Pänz un Ahle jelde als Jeschenk.
Die Minsche do kenne kein Ping un Leid,
un och kein Angs, wat d'r nöchste Dach wal brengk.
Met Arbeit verbrengk mer do en Rauh d'r Dach,
des Ovends sitz mer vör dem Huus,
un drink und schwad, un singk un laach;
des Naaks weed jeknuutsch un jeschmus.
 
Irjendwo dovöre, wo de Stroß ophöt,
Irjendwo dovöre, wo de Stroß ophöt ...
 
Et Wedder schleit öm, d'r Himmel weed schwatz,
d'r Wind blös mer Rän en et Jeseech.
Ich föhl mich verloße, kapott un kalt,
ohn' Eng trick sich dä Wäch.
Un monchmol springk en Angs mich an;
dann denk ich, ich wör ne Jeck,
dä nit sing Dräum verjesse kann
vun dem Land am Meer
un op dä Stroß dohin zick Johre allt trick.
 
Ävver
irjendwo dovöre, wo de Stroß ophöt ...
 
Am Himmel zeich sich ne Selverstrief'
Du jeis met - un jetz han ich Mot.
Du häs dieselve Dräum wie ich,
met Dir jet et mer jot.
Zick du mer sats: "Ich jon met dir",
weiß ich: mer kumme dohin;
un op dä Stroß treffe mer
vill Minsche,
die, wie du un ich, unnerwägs allt sin.
 
Denn
irjendwo dovöre, wo de Stroß ophöt ...
 

rollybrings

Diese Seite ist Bestandteil von coelle.de